發表文章
兩年幾冇離開香港散散心，早前兔比同友人一齊去台中台北食玩買，真爽！由於其中一位友人係台灣通，作為團中嘅一隻鴨仔行程住宿都無須費心，只要講想去邊買咩佢都會盡量安排，實在太太太好，辛苦晒佢啦！
今次6日5夜行程，先飛台中玩3日再搭車上台北，響台北玩3日飛返香港，首3日台中行程大致如下：
Day 1 : 香港 → 寶島時代村 → 18℃巧克力工房 → 塔洛彎景觀餐廳 → 清境農場
Day 2：清境農場 → 清清草原 → 日月潭 → 宮原眼科 → 逢甲夜市
Day 3：薰衣草森林 → 新社莊園 → 后里馬場 → 天馬牧場 → 台北
香港直飛台中可以省卻交通費同時間，但台中交通無台北咁方便，所以今次台中遊都靠旅遊租車四圍走，一到埗就有專車接送，而租車公司係友人相熟，行程自由度比較大，負責人David實在超級nice，充當司機之餘仲帶我地去新景點呢~
首站係上年先開幕嘅寶島時代村，集飲食及購物於一身嘅懷舊主題區，入場費NT150當中包括NT100消費劵，即實質入場費只不過係NT50，入去遊遊同影下相都抵返吧
懷舊寶島大街同集集火車站場景都殺唔少菲林
廣場位置仲有表演睇
商品唔岩心意，大可以用消費劵醫醫肚，選擇多多
上清境前去左趟18℃巧克力工房，其實不過係一間朱古力店，售賣生朱古力及手做朱古力等製品，旁邊有雅座可以坐住慢慢品嚐，仲有咖啡免費提供
一場黎到作為朱古力怪嘅兔比都敗左份生朱古力試試，入口一如想像咁柔滑，不過以小店黎講價錢未免有點奢侈，單單哩盒 20粒 85%生朱古力已售NT350
購朱古力會附上冰包，但保温袋就要另購囉~ 由於朱古力要保持冷藏，所以行程上要帶住比較麻煩
買過朱古力就上清境啦！山路又黑又曲折，沿途都無照明，反正窗外咩景都睇唔到索性小睡一下 ZZzz.. 以為上左山就無啖好食，響路途上嘅塔洛彎景觀餐廳食晚餐，實在意想不到咁好味~ 甕仔雞同砂鍋魚頭火鍋都一級捧！
甕仔雞以香料醃製再烤，上檯時遠遠已經聞到香味，原隻上關係會附上手套俾食客將雞隻撕開，戴上隔熱手套及膠手套就開始撕呀撕，友人嫌兔比笨手笨腳，只等兔比撕走兩隻脾忍唔住要出手
甕仔雞會附有醬料，不過本身香料味好濃，唔醮醬都已經夠滋味，而且雞外皮烤到脆脆，平日食雞唔食皮嘅兔比連皮都愛食 (๑´ڡ`๑)
砂鍋魚頭火鍋絕對重量級份量，有盆菜咁大鍋，魚頭炸過但魚肉唔會乾巴巴，湯底用多種蔬菜熬成，一點腥味都無反而好鮮甜，飲飲湯正好響氣溫驟降嘅山路上暖暖身
塔洛彎景觀餐廳日間可以遠眺270度湖光山色，可惜入夜後周圍都漆黑一片咩都睇唔到呢(ㆀ˘･з･˘) 食飽飽又繼續上清境之路
入夜後四圍都黑漆漆，一到清境國民賓館都及早休息，因為凌晨三點就要起身上合歡山睇日出！上到山大概凌晨四點幾，見到嘅係滿天星星，友人仲話見到流星，對城市人嘅我地絕對難得一見，可惜咁靚嘅畫面用相機拍唔到
之後兔比渡過人生一個最難熬嘅日出，從來唔覺一個鐘原來可以咁漫長．．．山上凍到不得了，大慨只有6-8℃，響車上已感覺到陣陣寒意，原以為有十幾度嘅兔比只有幾件單薄嘅衫，好在友人作好準備有外套可以借黎著，不過著左外套圍左頸巾仍然凍到全身不自覺地發抖，加上山路曲折搖到頭暈作嘔，超級辛苦ʕ•༘͡.•ʔ 兔比以為自己會熬唔到落山
凌晨六點終於等到太陽出黎（心中要呐喊出黎！），氣溫暖得多，不過兔比已經凍到無好心情，急急影過相留念就下山
搭車落返國民賓館兔比仍然好唔舒服，連早餐嘅胃口都無，食過藥小睡左陣好在無大礙又可以繼續行程，不過哩個故事教訓兔比以為一定要帶夠衫先好上山ʕ•༘͡.•ʔ
由於篇幅比較長，接住行程下篇再大家分享~ 您會有興趣繼續睇吧？
由於篇幅比較長，接住行程下篇再大家分享~ 您會有興趣繼續睇吧？
邊個叫你帶唔夠衫咩，哈哈。
回覆刪除幸好無事，如果唔係，之後個幾日既行程就要落湯了。哈。